"Çîrokên H.Kovan Baqî, zemên û zimên dikin hêlekaneke pirralî; hem li vî alî, hem li hemû alîyên dî.

Zeman û ziman di rêwitîya hafizeyê de dibin trajedî, trajedî dibe Torosên spî û spî dibe şeva tarî. 

Spî tarîtir e ji tarîyê.

Kîso dilezîne bona ji goristanê bibihure û xwe bigihîje beza çîrokên hişê xwendevên... Lê Kîso çiqas dimeşe, goristan di sekna xwe de ewqas firehtir dibe, laşê welêt dixwe û welat di zemên û zimên de dibe zindîbûneke ebedî."                              

Eyşana Beravî

"......

Gava destên wan dimeşîyan cênîkên min diêşîyan 

Gava gotinên wan dimeşîyan nava min diêşîya. 

Erebe sekinî, dengê wê jî sekinî. Derîyên erebê vebûn, du destên bi qawet di bin çengên min de bi cî bûn û em rabûn çûn.

Min go, “Qey çavên erebê jî wek ê min girtî ne, loma evqas li kirik û koncalan diqewime?”

Çar kennê cuda di hundirê erebê de bûn kennekî dêwasa.

“Kirik û kortikên vî bajarî ji tekerên ereba me ‘hez dikin, ji ber vê bi lez tên û xwe diavêjin pêşîya erebê.”

Erebe diloqe, nava min jî pê re. Baş e parîkek xwarin di hûrê min de tune, yan na wê ji devê min biavêta.

......"

Nivîskar H. Kovan Baqî Kî Ye?

H. Kovan Baqî, di sala 1972’an de li Heramya/Dêrika Çîyayê Mazî/Mêrdîn ji dawa dêya xwe ket. Dibistana seretayî li Heramya/Dêrikê xwend û dev ji xwendina dibistanê berda.  Ligel çîrok û romannivîsînê, karê edîtorîyê dike û ceribînan dinivîsîne. Pêvajoyekê karê weşangerîyê jî kir. Di sala 2021ê de tevî projeya Belongingsê bû. Belongîngs ji bo nivîskarên Samî û Kurd projeyeke pevguhertina dualî bû û bi hevkarîya mala wêjeyê ya Samîyan Tjállegoahte (Swêd) û Wêjegeh Amed (Amed) hatibû sazkirin. 5 nivîskarên Kurd û 5 nivîskarên Samî beşdarî vê projeyê bûn. Bi boneya vê projeyê, di sala 2022an de çû Swêdê û Sápmîyê. Antolojîya rojnivîska nivîskarên Samî û Kurd di sala 2023yan de, bi Kurdî, Samî û Îngilîzî, ji alî Weşanxaneya Lîsê derçû. H.Kovan Baqî jî yek ji nivîskarê vê antolojîyê ye. Niha li Îzmîrê dijî.

Berhemdarî:

Çîroka Çîrokan (Çîrok) Weşanên Bajar, 2004 – Stenbol

Bêexlaq (Çîrok) Weşanên Na, 2012 – Îzmîr

Prematür (Roman - Tirkî) Weşanên Na, 2014 – Îzmîr 

Heteroglossîa (Roman) Çapa 1mîn, Weşanên Ronahî, 2014 – Amed

Aporîa (Roman) Weşanên Na, 2015 – Îzmîr

Dîfférance (Roman) Weşanên Na, 2016 – Îzmîr 

Aporia (Roman - Tirkî) Weşanên Na, 2016 – Îzmîr

Heteroglossîa (Roman) Çapa 2mîn Weşanên Na, 2017 – Îzmîr

Sî’bera Zeyno (Roman) Weşanên J&J, 2017 – Amed 

Ölmeyi Beceremeyen Hiç (Roman - Tirkî) Weşanên J&J, 2018 – Amed  

Kim (Roman - Tirkî) Weşanên J&J, 2019 – Amed

Kî / (Roman) Weşanên J&J, 2019 – Amed

Orok (Roman) Weşanên Lîs, 2020 – Amed

Belongings (Antolojîya Rojnivîskên Nivîskarên Kurd û Samî, bi Kurdî, Samî û Îngilîzî)  Weşanên Lîs, 2023 – Amed

Torosa Spî (Çîrok) Weşanên J&J, 2024 – Amed 

Dergeh | Sêber-1 (Roman) Weşanên J&J, 2024 – Amed

Perestgeh | Sêber-2 (Roman) Weşanên J&J, 2024 – Amed

Nîngeh  | Sêber-3 (Roman) Weşanên J&J, 2024 – Amed